Ryfylkejakta «Brødrene af Sand» vart bygd i 1866 ved Dokkskar i Yrkesfjorden i Vindafjord som lastefartøy. «Brødrene af Sand» er kravellbygd med hud og spant i furu. Hovudframdriftsmiddelet er segl, gaffelrigga, og ein dieselmotor av typen Perkins N130C med 130 hk. All løpande rigg på fartøyet er av tjæra naturhamp, og segla er av bomull.
«Brødrene af Sand» er ei Ryfylkejekt og vart bygd i Sagvika på garden Dokkskar i Yrkesfjorden i 1866. Allereie året etter gjekk Elling Trulsen Bru med jekta til Austersjøen med 269 tønner sild. Fartøyet var opphavleg klinkbygd, men vart bygd om til kravell i 1896. I 1905 kom jekta til Sand, der brørne Sven og Nils Eide dreiv fraktefart i fjordane med «Brødrene af Sand» og «Anna af Sand» fram til 1967. Den første motoren kom om bord i 1917 og var ein 22 hk semidiesel. Tryggen Larsen overtok jekta i 1969 og starta arbeidet med tilbakeføring til slik ho var tidleg på 1900-talet.
I 1997 overtok Ryfylkemuseet jekta med mål om totalrestaurering tilbake til 1905. 28. august 1999 kom ho frå Hardanger Fartøyvernsenter til Sand og var ferdig restaurert. «Brødrene af Sand» er verna av Riksantikvaren.
Ei ivrig dugnadsgruppe i Venneforeininga til «Brødrene af Sand» står for drifta av fartøyet og brukar seglingssesongen til kulturformidling med jekta. Det er rundt 10–15 personar som aktivt deltek på arrangement, dugnader og seglingar i venneforeininga.
